1Pe 3 | APZ | STEP | A'amu nom'ni hwamne'no syoho ulohofiyɨwo'nɨngkohofo sohwa kakwo'yohumo enjwa'mo humawo'nɨngkohofo oso pa'nyoso sekwo moya'mi hwehwanjo sofasi sekwoe hwehwafe hungkunomo enjwa'mo fosyohumamno. I hwehwo huhwo sohwa hofɨko Anɨtuye hungkunomo tɨfi minɨngkayo'njo ikujo'no sekwo hofɨkimo hungkuno pi'nɨngo lutɨhwafɨkutoho. O'o, hofɨko sekwoe yahino wopɨngo somo sehonɨngkuji wopɨngofoho hnnɨngkuji hofɨko huhwa sekwoe Anɨtumo tɨfi wosenɨngkapɨfe.

1 Peter 3

Hwe moya'misiyoswafe hungkunofoho.

1 A'amu nom'ni hwamne'no syoho ulohofiyɨwo'nɨngkohofo sohwa kakwo'yohumo enjwa'mo humawo'nɨngkohofo oso pa'nyoso sekwo moya'mi hwehwanjo sofasi sekwoe hwehwafe hungkunomo enjwa'mo fosyohumamno. I hwehwo huhwo sohwa hofɨko Anɨtuye hungkunomo tɨfi minɨngkayo'njo ikujo'no sekwo hofɨkimo hungkuno pi'nɨngo lutɨhwafɨkutoho. O'o, hofɨko sekwoe yahino wopɨngo somo sehonɨngkuji wopɨngofoho hnnɨngkuji hofɨko huhwa sekwoe Anɨtumo tɨfi wosenɨngkapɨfe. 2 Sekwoe hwehwo sohwa ole wolantɨfeho, Nje ape kako Anɨtuye hungkunomo tɨfi inɨngkawowo'nɨngkisosi kako yahino wopɨngo'nohini yontesi nje hungkunomo haloho nɨpewo'nɨngkisiyoho. Oso'no ngko huhwo'ni Anɨtuye hungkunomo tɨfi unɨngkamo. Hofɨko sekwoe honɨngkano wopɨngo somo sehonɨngkuji ose wohnnantɨfeho. 3 Moya'mi sofasi sekwo sekwoe a'apaho somne'no a'amuso wonahonɨfe lɨkuji wokoso yo'mayo yo'mayo manji'mofo songo oso ikuji mijiyomjo oso yo'mayo so'no huno pi'nɨngo syafɨhu'nɨngkutoho. 4 O'o, sekwoe sɨmeho ajwomo'mo oso wokoso wonyoangkafoso fotofahinɨmno. Oso sɨmehomjo wokoso hiso olenoho. Sekwo nom'ne a'amu somne'no yoka hungkuno sɨmeho tohino masemnyo'njo sekwoe sɨmeho wopɨngo'nji fosyohumamno. Oso wokoso hiso muyonɨmofe'njo ne'no foto'naweho. Oso wokoso homo somo Anɨtu kako nokohonɨngkuhwosi kakoe sɨmeho wopɨngo umo'nɨmontonoho. 5 Hohonta moya'mi sofa hofɨko Anɨtumo sɨmeho hi'ntnnono umotofo sofa hofɨko oso sɨmeho'mjo wokoso hiso foto'nɨmentohofofoho. Oso wokoso hiso nofoto'nontɨfi hofɨkoe hwehwafe hungkunomo enjwa'mo humamentohofofoho. 6 Apɨlohamɨye ape Sola, kako ose imojiyoho. Sola kako Apɨlohamɨye hungkunomo tɨfi inɨngkawento nje hwe engo hwosoho ulɨmentisofoho. U sekwo oso Solafe yahino somo tɨfi inɨngkafijo'manji sekwo yo'mayo hungkuno sekwoe hwehwo sohwa selɨfijo so'no iyoho masenonehoho. Oso'no sekwo Solafe mehomi umo'nantɨfeho.

7 Sekwo hwe ape'njo sohwasi sekwo huno wopɨngo tɨpemafɨkuji sekwoe ape sofanji hofiyo'no fosyohumamno. Sekwoe yokumpohn'nyo sekwoe moya'mi sofafe yokumpohn'nyo somo yakolo'nnyo hwasoho. Oso'no sekwo hofɨkine'no syafɨsyɨkuji ufo'mapmno. Oso hwoya'mi hofo sofamo Anɨtu kako hofɨkimo wopɨngo uloho'mentiso so'no hofɨko sekwo'nji songo ne'no humantokutnnefoho. U sekwo oso hwoya'mi sofamo wopɨngo ulohofɨkujo'no sekwo Anɨtumo yo'mayo so'no jomo ujoso yo'mayo wonyoso sekwoe mampaho Anɨtumo jomo ujo somo masehoholofonehoho. O'o, kako wosepa'nɨmontonoho.

Nakwo sɨmeho afa inɨngkohwasi wohumano.

8 Olo hungkuno losojwaofoneso ngko sekwo a'amu hopi'nonohinokune'no waselɨmonne'no yohono. Sekwo sɨmeho afa inɨngkuji nom'ne a'amu somo sɨmeho uyɨmno. Sekwo senɨngkwa'wehwosamne'no hitoho selofɨwo'nɨngkiso pa'nyoso sekwo a'amu hopi'nonohino somne'no hitoho selofɨhwoso'no wopɨngo ulohopmno. Yokumpohn'nyo yahinoso foho'naopmno. 9 U, a'amu sekumo wonyo selohofɨkujo'no u sekwo hofɨkimo aku uyo'eno. Hofɨko sitofo selɨkujo'no sekwo sitofo aku nulɨkutoho. O'o, sekwo Mpohumo oso a'amu homo somo sɨmeho pompengo umofo'ne isamoyoka ulɨmno. Sekwo ose ikujo'no Anɨtu kako wopɨngo waseloho'montonoho.

10 A'amu fihwo kako Anɨtuye hungkuno fehohnjo mtɨ'mokumentiso sohwo ole mtɨ'mokumento,

U a'amu kako ngko sɨmeho wopɨngo'nji wohumamo lɨhwosɨ'manji kako hungkuno wonyo'nji hwasyo hungkuno'nji malonehoho.
11 Kako yahino wonyo somo hohujo ikinjaofɨhwosi kako yahino wopɨngo'nohini uyono.
Kako sɨmeho pompenjiyo so'no syoho ihwosi oso yahino wopɨngo hiso notɨpemahwosi oso yahino homo somo tɨfi unɨngkaweno.
12 Anɨtu kako kakoe a'amu yahino wopɨngo'njo somo uhwonɨwo'nɨngkisofoho.
Oseso Anɨtu kako sɨkuno engolopohamo hofɨko jomo ulɨwo'nɨngkohofo somo haloho pewo'nɨngkiso hweho.
Oseso Anɨtu kako a'amu hofɨko wonyo iwo'nɨngkohofo somo uhwononto kako hofɨkine'no sɨmeho tohino umnɨngkuhwoso'no kako tohino uyo'ne hweho.
Ose mtɨ'mokumentisofoho.

Nakwoe yahino wopɨngo iwo'nɨngkuhwone somne'no tohino mayoso wopɨngofoho.

13 U sekwo honɨngkano wopɨngomo wowano lɨkuji yokumpohn'nyo yoho'nɨfijoso wonyo tɨhwo wasemokumontolo. O'o, awonoho. 14 I oso'no sekwoe yahino wopɨngo somne'no tohino mafɨkuji u sekwo sɨmonyo engo fiyɨmno. I oso'no sekwo sekwoe yahino wopɨngo somo inɨngkowentanɨngkuji hofɨko nosehonɨngkuji hofɨkoe yahino wonyo so'nji sekumo iyoho wesemofano lɨkuji selohofɨkujo'no sekwo iyoho senɨngkuhwoloho. Huno pi'nɨngo seyɨhwoloho. 15 O'o, awonoho. I Kɨlais kako jɨje Hwe Engo imokohojo'no kako'nohini wokumokosyohumano. I oso'no a'amu hofɨko sekumo ole woselohonantɨfeho. Sekwo yo'mayo wopɨngoso womano lontɨfi hontohumalofoso peho'neto. Ose selohonɨngkujo'no sekwo hofɨkimo hungkuno asomo komo'no ujo'neso sekwo nto'no fesyohumamno. Hungkuno hiso hofɨkimo hofiyo'no fɨlutɨhwamno. Sekwo hofɨkoe hunomo monje isyɨkutoho. 16 U sekwo yo'mayo iwo'nɨngkohofo so'no sekwoe sɨmeho sohwo wonyo hwosoho makijo'njo yoso'manji a'amuso hofɨko sekwo Kɨlaisɨmo inɨngkowalokwofo so'no sitofo selɨkujo'no hwangku sohonta hofɨko hwasyo hungkuno sejo so'no wonɨmango engo unɨmontonoho. 17 U nakwoe yahino wopɨngo iwo'nɨngkuhwone somne'no Anɨtu ole lososo tohino womapɨfe lososo tohino mayoso wopɨngofoho. U yo'mayo yahino wonyo somne'no nakwo tohino manoho lɨhwasi miyanehwono. Oso hiso nɨhu'no wonyofoho.

Kɨlais kako nakwoe wonyo wae yaofo'ne pe'nɨmentisofoho.

18 I nakwoe Hwe Engo Kɨlais kako wonyo nɨhu'no ane sohwo kako Anɨtuye pone'no upenemotasɨmo lonto nakwoe wonyo'mne'no sɨkuno anga'nohino somo tohino manto poyo pe'nɨmentisofoho. Hwe wopɨngo'nohini sohwo nakwo wonyo hn'nɨmo nayohope sohwo pe'nɨngkahonɨngki kakoe huyo'mango sohwo apa'no songo lɨkafonto kako songo humaho. 19 Kako nope'nonto kakoe huyo'mangoso tɨkanomo nowento kako a'amu poyo nto pe'nɨmentohofo osomo kakoe hungkuno wopɨngo lutɨhwamentisofoho. 20 Oso a'amu hiso hofɨko Nɨwa nohumentanɨngki hofɨko Anɨtuye hungkunomo hwotoho hmmotofofoho. Oso'no Anɨtu kako hofɨkoe yahino wonyo somne'no tohino komo'no umentiso'maho. O'o, Anɨtu kako hofɨko hofɨkoe honɨngkano wonyoso noho'naofɨkuji ngkimo sɨmeho wontopantɨfitɨkenonto hontohumamentisofoho. Oso hohosohonta Nɨwa kako yofayokino nomtɨ'mokonto oso yofayokino homo somo a'amu aho fehohnjo hopi'nono nom'ne mta'ni hufa'u sɨhune'nohini humamentohofofoho. Anɨtu mijopo mta'ni songo nohumentanɨngkofi asomo utɨma'mentisofoho. Mijomo mape'nɨmmentohofofoho. 21 Oso mijo hiso mijo kiyomayo huyo'mango pa'nyofoho. Nɨwa'montohwamo Anɨtu mijo mta'ni songo nohumentanɨngkofi asomo utɨma'mentisofoho. Oso mijo kiyomayo yahinoso a'apahomjo kiho wonyoso wae yaofo'ne'maho. O'o, Anɨtu kako nakwoe sɨmeho mo'mo wonyo wae yao'mentiso so'no utɨhwayo'nefoho. Mijo kiyomayo yahino neso olenoho. Kɨko ngkimo mijo wokiyonɨmapɨfe lohoji u kɨko Mpohwo Anɨtumo ole uso, Jisas kako poyo pe'nonto apa'no songo lɨka'mentiso so'no ngko a'amu songo pa'nyo jɨje honɨngkano wopɨngomo nto'no unɨngkamo. Ose uso. Mijo kiyomayo yahino neso osohifoho. 22 Jisas kako ahwomomno sɨmentisoso osopo nosonto kanɨngkwohwo Anɨtuye aho anga sohohnta'ni humaho. A'amu ahwomomjo hopi'nonohino so'nji yofe engo'njo so'nji yo'mayo yo'mayo yokumpohn'nyo so'nji Jisas kakimo enjwa'mo weho.